Ready to get started?
TOP Universities
October 09, 2023
Şotlandiyada Təhsil / Glasgow Universiteti
Seriyamızın 70-ci günündə Şotlandiyanın Glasgow şəhərində tələbəmiz Nigar ilə birgəyik.
1) Özünüzün təqdim edə bilərsiniz?
Mən Nigar Babazadə. University of Glasgow məzunuyam.
2) Universitetə hansı nəticələr ilə qəbul olmuşdunuz? Təhsilinizi necə maliyyələşdirirsiniz?
Universitetə 7 IELTS nəticəsi ilə qəbul olmuşdum. Təhsilimi Chevening təqaüdü ilə maliyyələşdirirdim.
3) Universitetdə təhsil necədir (dərslər, elmi araşdırmalar və s. akademik fəaliyyətlər)?
Universitetdə təhsil çətindir. Reytinq olaraq dünya üzrə TOP 100-dədir və düşünürəm ki, yüksəlməkdədir. Magistr təhsilim daha çox elmi araşdırmalara əsaslanmışdı. Müəllimlər də sahələrində sözlərini demiş professorlardır. Universitetdə çox geniş araşdırma imkanları var - dissertasiyamı da təcrübəli bir professor ilə araşdırma şəklində tamamlamışdım.
4) Bəs təhsil xaricində tələbə həyatı necədir?
Təhsil çox vaxtımı aldığından sosial fəaliyyətlər ilə çox məşğul olmadım. Baxmayaraq, universitetin vaxt keçirmək üçün çox geniş və gözəl ərazisi və kitabxanası var. Bundan əlavə, universitetdə tələbə komitələri, klublar və yarışmalar mövcuddur.
5) Olduğunuz ölkə və şəhər haqqında təəssüratlarınızı paylaşa bilərsiniz?
Britaniya ümumiyyətlə yağışlı ölkədir. Şotlandiya, xüsusən Glasgow isə ən yağışlı yerlərdəndir. Şəhərin çox gözəl havası, təbiəti, parkları var. İngiltərə, Londona səyahətlərimdə oraların da çox gözəl olduğunu görmüşdüm, amma Şotlandiya bir başqadır. İnsanlar çox mehriban və gülərüzdürlər. Heç irqçilik hiss etmədim, hətta məni evinə aparan, ailəsi ilə tanış edən şotland tələbə yoldaşım var idi. Həmçinin şəhərdə dünyanın müxtəlif yerlərindən tələbələr çoxdur.
6) Bu ölkədə, universitetdə və yaxud ümumiyyətlə xaricdə təhsil almaq istəyən tələbələrə nə kimi tövsiyələr verə bilərsiniz?
Əsas tövsiyəm ingilis dilini ən yaxşı şəkildə öyrənmək olardı. Bundan əlavə, getdiyiniz yerdəki aksentlərə də öyrəşmək yaxşı olardı. Mən getdikdə Şotlandların çox fərqli aksenti olduğunu bilmirdim və bu ilk ayda problemlər yaratdı. Təhsil alacağınız universitet haqqında da məlumatlı olmağı, professorlar, dərslər ilə maraqlanmağı və məqsədli olmağı məsləhət görərdim.
